මුහුණු පොතේ නාසිසස්

මම නාසිසස්... කවුද නාසිසස් කියන්නේ... නාසිසස් කියන්නේ පුරාවෘත්තයක්. සම්ප්‍රදායික අර්ථයෙන් පුරාවෘත්ති කියන්නේ පැරණි නමුත් පැරණි නොවන කතාන්දරවලට. අපි පුරාවෘත්තයකදී ඇත්ත නැත්ත බලන්නේ නැහැ. හරියට අපි ප්‍රශ්න අහන් නැතුව හින්දි චිත්‍රපටියක් බලනවා වගේ. අන්න ඒ වගේ පුරාවෘත්තත්.  පුරාවෘත හා අපි අතර තිබෙනවා ඒ වගේ ගිවිසුමක්.

පුංචි කාලේ මම වාක්‍යයක් ලිව්වා මම සිංහයෙක්මි කියලා. ඒ වාක්‍ය ව්‍යාකරණානුකූලව හරි. ඒත් මම සිංහයෙක් නෙවෙයිනේ... මෙතැනදි උඹලට ගාණක් නෑ වාක්‍යයේ අර්ථයත් සමග. මෙන්න මේ වගේ තමයි පුරාවෘත්තත්.

ඉස්සේලලා මේ කතාව අහපල්ලා. රොලන්ඩ් බාත් Mythologies වියමනේදී කියනවා. Myth කියන්නේ භාෂාවක් කියලා. ඊටපස්සේතව ටිකක් ඉස්සරහට ගිහින් ඔහු කියනවා පුරාවෘත්ත කියන්නේ එක්තරා කථන ක්‍රමයක් කියළා. මේ සන්ධර්භය ඇතුළේ මනෝවිශ්ලේෂණයේදි පුරාවෘත්ත නැත්නම් පුරානෝක්ති කියන්නේ හැඟවුම්කාරකයක් කියළා ඔහු කියනවා. හැඟවුම්කාරක (Signified) කියන්නේ ආත්මය එහෙමත් නැත්නම් (Subject) කියන දෙයට. ඒ කියන්නේ හැඟවුම්කාරයක් වෙනුවෙන් නියෝජනය කරන්නාට. Signifier represent another signifier of subject. හැබැයි කිසිම විටක හැඟවුම්කාරකයට අර්ථය හැඟවුම්කරණය කරන්න බෑ. ඒක කරන්නේ වෙනත් හැඟවුම්කාරකයක් වෙනුවෙන් ආත්මය නියෝජනය කිරීමයි.

මේ අර්ථ සම්බන්ධය තුළ ඊඩිපස්ගේ ගේ ඉදන් මම නාසිසස් දක්වා සියලුම පුරානොක්තිවල උඹලට හමුවන චරිත හැඟවුම්කාරක පමණයි. ඒ කියන්නේ මේ චරිත අවුරුදු දහස් ගණනක් තිස්සේ උඹලව නියෝජනය කරනවා.

දැං කවුද මේ මම කියන නාසිසස්? අවුරුදු දහස් ගණනක් පුරා කවීන්, විද්වතුන් ලේඛකයින් මාවයි එකෝවයි පට්ට ගැහුවා. ආ එකෝ... මට එයා ගැන කියන්න බැරිවුණා... මේ කතාවේ කොහේදි හරි මං උඹලට ඒකි ගැනත් කියන්නං. ප්‍රේමය, අහිමිවීම, මරණය, වැළපීම වැනි තේමාවන්ට අපි නිරන්තරවම ගොදුරු වුණා. ඒ අතරින් කැපී පෙනෙන නිර්මාණය තමයි ඕවිට් කියන රෝම කවියගේ මෙතොපොපොසිස්. ඔවිට්ගේ සැබෑ නම ඔබ්වියස් ඔලිවියස්. මෙතොපොපොසිස් තුන්වැනි ග්‍රන්ථයේ තමයි එකෝ සහ නාසසිස් පුරාවෘත්තය ගෙනහැර පාන මහා කාව්‍ය තියෙන්නේ. අපේ කතාවේ වැදගත්ම දේ  තමයි ආත්මීයත්වයේ ස්වභාවය පිළිබඳ දර්ශනික කතාබහ.

දැං ආපහු එමු ආත්මීයත්වයට. එක අතකින් මම කියන පුද්ගලත්වය මෙම ආත්මීයත්වය සම්බන්ධයි. හැබැයි ආත්මීයත්වය කියන දේ මම කවුද කියන ප්‍රශ්නයටත් උත්තර සොයනවා. මේ ප්‍රශ්නයට උත්තර සොයන විට මෙහි අර්ථය ආත්මීයත්වය, විශ්වය, සදාචාරය, ආගම, කලාව ආදිය ගැන මා දරා සිටින විශ්වාසයන්ට අදාළ නැහැ. එය මගේ අනන්‍යතාව සහ පැවැත්ම ගැන කරන ගවේෂණයක්. මින් මම කරන්නේ ආත්මයක් ලෙස ගොඩනැඟීමයි.

ඔමිට අපේ කතාව පටන්ගත්තේ අපෙන් නෙවෙයි. ඔහු පටන් ගන්නේ ජූනෝ සහ ජුපිටර් කියන දෙවිවරු දෙදෙනාගේ හැමනෙනකොට වැඩිම සතුටක් ලබන්නේ පිරිමියා ද ගැහැනිය ද කියන විවාදයෙන්. මේ විවාදයට තෙරේසියස් කියන පුද්ගලයත් සම්බන්ධ වෙනවා. ඔහු දෙවියෙක් නෙවෙයි. ඔහු මනුශ්‍යයෙක්. ජූනෝ සහ ජුපිටර් මේ ප්‍රශ්නය තෙරේසියස් ගෙන් අහනවා. තෙරේසියස් ගෙන් මේ ප්‍රශ්නය අහන්න හේතුවක් තිබුණා මොකද තෙරේසියස් කියන්නේ පිරිමියෙක් ලෙස උපත ලබා කාලයකට පසු එකපාරටම ස්ත්‍රියක් ලෙස ජන්මයක් ලැබූ කෙනෙක්. මෙතනදි තෙරේසියස් ජුපිටර්ගේ පැත්ත අරගෙන කියනවා වැඩිම ආතල් එකක් තියෙන්නේ ස්ත්‍රියයි කියලා. හත්ඉලවුවයි. ජූලි හතයි. ජූනෝට ඒකට කේන්ති ගිහින් තෙරේසියස්ව අන්ධයෙක් කළා. හැබැයි යම්කිසි සහනයකුත් තෙරේසියස්ට දෙනවා. ඒ තමයි අනාගතය ගැන කීමේ හැකියාව තෙරේසියස් වෙත ලබාදීම.

මේ කතාව මට සම්බන්ධ වන්නේ මෙහෙමයි. මගේ අම්මා වෙරියොව් නම් ජල අප්සරාවක්. මගේ අම්මාව දූශණය කළා ගංගාවට අධිපති පාහර දෙවි කෙනෙක් විසින්.  එම දූශණයේ ප්‍රථිපලක් විදිහට තමයි මම අම්මාගේ බඩට ආවේ. මම ඉපදුනාට පස්සේ මගේ අම්මා මාව තෙරේසියස් ළගට අරගෙන ගියා පේන අහන්න. පළවෙනි පේනය විදිහට අම්මා අහනවා මගේ දරුවා නාසිසස් බොහෝ කලායක් ජීවත් වෙනවාද කියලා. තෙරේසියස් කියන්නේ එයා තමන්වම නොදැන සිටී නම් බොහෝ කාලයක් ජීවත් විය හැකි බවයි. පාහර තේරේසියස්... මම මොකටද මට බයවෙන්නේ? කුණුහර්ප ඕවා.

කොහොම වුණාත් මම මාර කඩවසම්. මට සෑහෙන්න දෙනෙක් ප්‍රේම කළා. එත් මං ඒවා ගණන් ගත්තේ නෑ. එකෝ... එකෝත් මට ප්‍රේම කළා.

එයාගේ කතාවත් මාරයි. එයාට කට හඬක් නෑ. ඒක නැතිවුණේ මම කලින් කියපු ජුපිටස් සහ ජූනෝ ගේ වාදයේම ප්‍රථිපලයක් හැටියට. ජුපිටර්ගේ හොර කොටුවලට උදවු කළේ එකො. ඒ නිසා ජූනෝ එකෝගේ කට හඬ අහිමි කරනවා. කරලා එකෝට යම් කිසි සහනයක් දෙනවා කෙනෙක් කතා කරන දෙයින් අවසන් වචනය අල්ලාගෙන එය ප්‍රතිරාව කරමින් කතා කරන්න.

මම වනාන්තරයේ දඩයමේ යනකොට එකෝ මගේ පසුපසින් ආවලු. ඒත් මම දන්නේ නෑ.... ඇත්තම කිවුවොත් මම ගණගන්නේත නෑ..

අන්තිමේ මම විලක් ගාවට ආවා. විලේ වතුරෙන් දැක්කා මගේම කදිම කඩවසම් රූපය. පුදුම ලස්සනක්... මම ඒ රූපේ වැළගන්න හැදුවා.  ඒත් බැරි වුණා.

උඹලට තේරෙනවද? ඒ කියන්නේ තමන්ටම තමන්ව අහිමි වෙනවා.  අනිත් පැත්තට මම හිතුවා මෙහි සිටින අනිකා මාව මඟහැර යන්න හදනවා කියලා. මේ විදිහට මම මගේගේ රූපයත් එකක් බැඳිලා ඒ දිහා බලාගෙන නොකා නොබී ඉඳලා එතැනම මිය ගියා. ඊට පස්සේ එකෝ එතෙන්ට ආවා. ඒකි එනකොට මම විල පතුලටම යන්න ගිහිං. මම විල පතුලට යද්දිම විලෙන් එළියට ආව රතුපාට මලක්. එකෝ දැක්කා ඒ රතු මල. එදා ඉදන් ඒ මල නාසිසස් මල වුණා. අර දයාන් විතාරණ සින්දුවක කියන ඩැෆටිල් කියන්නෙත් නාසිසස් මලටම තමයි.

දැන් උඹලා අහන්න ඕන අවුරුදු දහස් ගණනක් පැරණි කතාව අපිට අදාළ වෙනවද කියලා? ඒ කියන්නේ මේ කතාවෙන් සමකාලීන උඹලව නිරූපණය වනවාද?

අදත් උඹලට ඕන තරම් නාසිසස්ලා හමුවෙනවා. උඹලා හැමෝගෙම නාසිසස් ලක්ෂණ අඩුවැඩි වශයෙන් තිබෙනවා. ෆේස්බුක් කියන්නේ නාසිසල්ලා බල්ටි ගහන පිට්ටනියක්.

නාසිසස් තමන්ගේ මුහුණ දකින කැඩපත තමයි විල. උඹලගේ කාලයේ නාසිසස්ලා තමන්ගේ මුහුණ දකින කැඩපත තමයි මුහුණු පොත. ඔවුන් ඒ මත එබීගෙන ඉන් පෙනෙන තමන්ගේ රූපයට වශීවී සිටිනවා.

මොනවද මුහුණු පොත බලාගෙන බලාගෙන යන විට හමුවන්නේ...

මෙන්න බලන්න මං කවියක් ලිව්වා ලස්සනයි ද බලන්න

ඒකට කමෙන්ටුවක් එනවා අනේ කොච්චර ලස්සනයි ද අක්කේ ඔයා කොච්චර ලස්සන කවියෙක්ද?

මෙන්න බලන්න යාළුවනේ මං ලිව්වා මේ කවිය ගැන විචාරයක්.

දැං කවියො විචාරකයො මේ විදිහට බිහිවෙනවා වගේ තමයි පඬිවරුත් මේ හරහා බිහිවෙනවා.

එක්කෙනෙක් පොත් රාක්කයක පින්තූරයක් දානවා. දාලා කියනවා බුක් ෆෙයාර් එකෙන් මං පොත් ටිකක් ගත්තා මෙන්න ඒ පොත් කියළා.

එකෙන් කියන්නේ ඒ පොත් ටික කියවන නිසා එයා පඬිවරයෙක් කියළා.

තව පිරිසක් ඉන්නවා මුහුණු පොතේ තරඟෙට කුණුහර්ප කියනවා. ලොකුම කුණුහර්ප කියපු කෙනා තමයි පොර බවට පත්වන්නේ. මේක සංස්කෘති ගැටළුවක් නෙවෙයි ශිෂ්ඨාචාර ගැටළුවක්.

උඹලා නොදන්නා දේ තමයි මොවුන් බර පතළ මානසික රෝගයකින් පීඩා විඳින බව. ඒ රෝගය තමයි නාසිසිටම්.

මනෝවිශ්ලේෂණයේදි ස්ලැවොයි ජිජැක් මෙය හඳුන්වන්නේ රෝගි නාසිසස් කියා. ලැකාන්ගේ ප්‍රවාදය ඇතුළේ අද අප ගෙවන්නේ ධනවාදි කතිකාවතක්. මීට කලීන් ආත්මය කියන්නේ හැඟවුම්කාරකයකට. නමුත් අද කාලයේ ආත්මය කින්නේ භාෂාවේ ප්‍රථපලයක්. මේ නිසා තමයි සමහර මිනිස්සු තමන්ගේ පෙත ගැන පත්තරේ පළවුණු විචාරයක් මුහුණු පොතේ පළ කරලා මේ මගේ පොත ගැන අහවලා විචාරයක් ලියලා කියා දන්නේ. ඒ මදිවට ලියනවා මං ගැන ලිවුවට ස්තූතියි අයියේ කියළා.

ඉස්සර කලා කෘතිය හා කලාකරුවා අතර යම්කිසි පරතරයක් තිබුණා. ඒ කියන්නෙ කලා කෘතිය සමාජයට මුදා හැරියට පස්සේ කලාකාරයා ඒ ගැන කතා කරන්න මැදිහත් වෙන්නේ නැහැ. අද තමන්ගේ නිර්මාණය විවේඡනය කරන්න තමන්ම ඉදිරිපත් වෙනවා. පදික වේදිකාවේ බඩු විකුණන්න මහන්සි වෙන තුට්ටු දෙකේ වෙළෙන්දො වගේ.

ක්‍රිස්ෆෙර් ලාෂ් කියන විද්වතා පොතක් ලිනවා කල්චරල් ඔෆ් නාසිසස් කියලා.  ලාස් මිචොෆ් ෆුකොක් වගේ තමන්ගේ ප්‍රවාදය ඓයිතිහාසික සන්ධර්භයකට ගෙනයන කෙනෙක්. ඔහුගේ ලිවීම ගැන ජිජැක් කියනවා සමකාලීන අධිකාරීවාදි පාරිභෝගික සමාජය මේ දාර්ශනික විචාරය හරිම තියුණුයි කියලා. ජිජැක් කියනවා 1986දි මුහුණු පොත කියලා කිසිම දෙයක් නැති කාලෙක දිව්‍යඥනයෙන් කියනවා මුහුණු පොත වැනි දෙයකින් නාසිසස් රෝගීන් බිහිවෙන බව. ඔහු මෙහි රෝග ලක්ෂණ ලැයිස්තුගත කරනවා.

මින් මූලිකම ලක්ෂණය තමයි පරිසරයට හැඩගැස්වීමේදී ඔහු ඉතා දක්ෂයෙක්. හැබැයි තමන් තමන් පොර කියන දේ පෙන්නනවා. තමන්ගේ කවියට කමෙන්ට්ස් එවන ඔහුගේ අශිරාරික මිතුරන්ට තමාට තමාවම තහවුරු කරගැනීමට උපකාරී වන උපකරණ ටිකක් පමණක් වනවා. ඊට පස්සේ එයාලව අමතක කරලා දානවා. ඇත්ත වශයෙන්ම ඔහු පවතින්නේ ඔවුන්ගේ ඇගයීම සහ පිළිගැනීම මත. සමාජීය වශයෙන් ඔහු තමාව උත්කර්ෂයට නංවාගන්නවා. මං මුහුණු පොතේ දකිනවා තමන්ගේ අතීත වික්‍රමයන් කොටස් වශයෙන් ලියන පොරවල්. ස්වයං චරිතාපදාන ලිවිමත් එක්තරා විදිහක නාසිස්ස්ටික් රෝග ලක්ෂණයක්. මේහරහා වන්නේ තමාව තමා විසින්ම නිර්මාණය කරගැනීමක්.

ජිජැක් කියන විදිහට දැං හුඟක් සමාජ සම්බන්ධතාවල තියෙන්නේ නාසිස්ටික් ලක්ෂණ. මෙහිදි අව්‍යාජ ඇඟළුම්කමක් ගොඩනගා ගන්න බෑ. ඔහු අනිකා සමග මිත්‍රතා ගොඩනගා ගන්නේ තමන්ගෙන් විය යුතු යුතුකමක්, වගකීමක්, විශ්වාසයක් වෙනුවෙන් වගේ. මේ සම්බන්ධතා මූනිච්චාවට විතරයි. කෙනෙකුව වර්ණනා කරනවානම් ඒ නාසිස්ට්ක් ලක්ෂණ නිසායි. උඹලා ෆේස්බුක් එකේ කරන්නෙම ඔච්චරයි..මේ ගැන ජිජැක් කියන වටිනා අදහසක් තමයි නාසිස්ටික් රෝගියා තනිකමට බයයි. වයසට යනවට බයයි. අසනීපවලට බයයි. තමන්ගේ ශරීරය ගැන සැලකිලිමත්. ඒ හින්දාතමයි ෆොටෝෂොප් නැතුව උඹටලට ප්‍රොෆයිල් පික්චර් එක අප්ලෝඩ් කරන්න බැරි. මේ නාසිස්ටික් රෝග ලක්ෂණ උඹලා හැමෝම ළඟ තියෙනවා.

හරි දැං ඉතිං ලැස්තිවෙයල්ලා මැරෙන්න. උඹලට ඇහෙන් නෑ නේද එකෝ කෑ ගහන සද්දේ... පුතේ කන්න එන්න... නංගී ඔයා කොහේද? කෝ මේ දුව... මල්ලි ගෙදර නැද්ද... අයියා අසනීපෙන්ද.... ඕකේම ඔලුව ඔබං ඉන්නැතුව වරෙංකෝ... හහ් හහ් හා... පිස්සු එකෝ. ඒකි උඹලගේ ගෙදර උංට වැහිලා. ගණන් ගන්න එපා. ෆෝන් එකෙං එෆ්බීයටම වෙලා ඒකටම එබීගෙන හිටපං. පේනවද උඹට උඹව. උඹ උඹ දිහාම බලපං. උඹටම ආදරේ කරපං. අනිත් ඔක්කොම හාල්පාරුවෝ. උඹ විතරයි ලස්සන... උඹ උඹට විතරක්ම ලවු කරපං.... දැනෙනවද ඒ ආදරේ.... අන්න ආදරේ... උඹේම ආදරේ...  දැං උඹ තමයි නාසිසස්.... ලස්සනම ලස්සන නාසිසස්. එක පරයෙක්වත් නෑ උඹ තරං ලස්සන... දැං මැරියං...මැරියං... මැරියං... ෆේස්බුක් එක ඇතුළේම මැරියං... කාටවත් උඹව අයිති වෙන්න දෙන්න එපා... උඹ මැරියං නාසිසස්....

ලහිරු සමරසිංහ

(දාර්ශණික ආලෝකය දුන් සමන් වික්‍රමආරච්චිට තුති)

ට්විටර් සහ නූතන දේශපාලනය ( The Relationship Between Modern Politics & Twitter )

ට්විටර් සහ නූතන දේශපාලනය
( The Relationship Between Modern Politics & Twitter )

- Chanika Athauda 

  නූතන දේශපාලනයට නව මාධ්‍යයෙහි සක්‍රීය දායකත්වයක් වර්ධනය වෙමින් පවතී. ලංකාව වැනි රටවල පවා මේ වන විට දේශපාලනඥයින් මට්ටු කිරීමේ අපූරු මෙවලමක් බවට මෙම නව මාධ්‍ය පත් වෙමින් පවතී. නීතිය ඉදිරියේ දණ නොගැසූ දේශපාලනඥයින් කුඩා ස්මාර්ට් දුරකථනයක් අතැති කොලු ගැටයෙක් ඉදිරියේ පසු බසින අවස්ථා දක්නට ලැබේ. රාජ්‍ය නිලධාරීන්ට, ආරක්ෂක නිලධාරීන්ට පමණක් නොව තමන්ට බලය දුන් ජනතාවටද චන්ඩිකම් කළ දේශපාලනඥයින් මේ කුඩා ජංගම දුරකථනය අබියස තවදුරටත් චන්ඩියන් නොවේ. ඉතා කෙටි කලක් තුළ නව මාධ්‍ය එලෙස විශාල බල පරාක්‍රමයක්  ගොඩනඟා ගත්තා පමණක් නොව, සියලු දෙනාටම අත්‍යවශ්‍ය අංගයක් බවට පත්ව ඇත.

   දේශපාලනඥයින් මෙම නව මාධ්‍යවල බලය සහ එයින් තමාට ලබා ගත හැකි ශක්තිය  පිළිබඳ අවබෝධ කර ගන්නේ මීට දශයකට දෙකකට පෙර සිටය. නව මාධ්‍ය දේශපාලන ක්ෂේත්‍රයේ අද අත්පත් කරගෙන සිටින ස්ථානය සඳහා වූ මෙහෙයුම ඇරඹෙන්නේ 90 දශකයේදීය. කෙසේ නමුත් මේ වන විට සෑම දේශපාඥයෙකුටම සමාජ මාධ්‍ය අත්‍යාවශ්‍ය වන තත්වයට පත්ව ඇත. අතීතයේදී පෝස්ටර් ව්‍යාපාර, දේශපාලන රැස්වීම්, ගුවන් විදුලි දැන්වීම්, රූපවාහිනී දැන්වීම් ආදී විවිධ ක්‍රම මගින් දේශපාලන සන්නිවේනය සිදු විය. නමුත් වර්තමානය වන විට එම සීමා අභිබවා යමින් සිය දේශපාලන සන්නිවේදනයේ ප්‍රධාන මෙවලම ''සමාජ මාධ්‍ය වන තත්වයට දේශපාලනඥයින් විසින්ම පත් කරගෙන ඇත.

  දේශපාලනය, මහජනයා හා මාධ්‍ය අතර තොරතුරු සන්නිවේදනය වන ක්‍රියාවලිය දේශපාලන සන්නිවේදනයයි. එනම් දේශපාලන සන්නිවේදනය තුළ ප්‍රධාන පාර්ශව තුනක් සිටී.

* දේශපාලන සංවිධාන ( Political Organization)

* මාධ්‍ය ආයතන    ( Media )

* පුරවැසියෝ  ( Citizens )

  දේශපාලන සංවිධාන යටතට පක්ෂ, මහජන සංවිධාන, පීඩනයක් ඇති කළ හැකි පාර්ශව, ත්‍රස්තවාදී කණ්ඩායම් සහ රජය යන පාර්ශව අන්තර්ගත වේ. මෙම සියලු පාර්ශව අතර සිදුවන සන්නිවේදනය දේශපාලන සන්නිවේදනය නම් වූ ප්‍රධාන කුලකයේ අනු කුලක වේ.

 

  සමාජ මාධ්‍ය මැතිවරණ ව්‍යාපාරයකට යොදා ගැනීම පිළිබඳව සාකච්ඡා කිරීමේදී ඇමෙරිකාවේ මැතිවරණ ව්‍යාපාර පිලිබඳව අවධානය යොමු කිරීම අත්‍යාවශ්‍ය වේ. එහිදී මැතිවරණ ව්‍යාපාරයට සමාජ මාධ්‍ය යොදා ගැනීම ක්ෂණික ක්‍රියාවක ප්‍රතිඵලයක් නොවන අතර එය දිගු කලක් පැවැති ක්‍රියාදාමයක ප්‍රතිඵලයකි. 1992 වසරේදී අමෙරිකා මැතිවරණ ප්‍රචාරණ ව්‍යාපාරය නව මානයකට යොමු කළ වසරක් විය. ඒ රූපවාහිනී ප්‍රසිද්ධ විවාද හඳුන්වාදීමත් සමඟය. ඊට සමගාමීව නව ආකාරයක මැතිවරණ ප්‍රචාරණයක්ද හඳුන්වා දුණි. ඊට පෙර එම තත්වය තිබු‍ණේ පෝස්ටර්, දැන්වීම් පත්‍රිකා, ගුවන් විදුලිය ආදියටය. නමුත් 1992 මැතිවරණයේදී නව ආකාරයක මැතිවරණ ව්‍යාපාර දියත් විය. එහිදී වඩාත් ඉහළ භූමිකාවක් රඟ දැක්වූයේ ''බිල් ක්ලින්ටන්'' මහතාය. ඔහු ''ලැරි කිංග් ලයිව්'' නම් උදෑසන වැඩසටහනට, එම්.ටී.වී නම් වූ නාලිකාව ඉදිරිපත් කළ වැඩසටහනට පමණක් නොව රාත්‍රී රූපවාහිනී වැඩසටහනකටද එක් විය. එම රාත්‍රී රූපවාහිනී වැඩසහටනේදී ක්ලින්ටන් වාදකයෙකු ලෙස සැක්සෆෝනය වාදනයටද එක් වූ අතර එය ඉන් අනතුරුව ගීත දර්ශක ආදියටද ඇතුළත් විය. එම වසරේදී ඇමෙරිකා ජනාධිපතිවරණයට ඉදිරිපත් වූ ''රොස් පෙරට්'' ( Ross Perot ) නම් ව්‍යාපාරිකයාද සාර්ථක මැතිවරණ ප්‍රචාරණ ව්‍යාපාරයක් දියත් කළේය. ''ලැරී කිංග් ලයිව්'' වැඩසටහනට ඔහුද එක් විය. එයද බොහෝ දෙනකෙුගේ අවධානයට ලක් වූ අතර  සී.එන්.එන් රූපවාහිනිය සිදු කළ සමීක්ෂණයකදී ඉදිරියෙන් සිටියේද රොස් පෙරට් ය. සමාජ මධ්‍ය දේශපාලන සන්නිවේදයට යොදා ගැනීම සඳහා ඇමෙරිකාවෙන්  සැලසුම් නිර්මාණය වන්නේ ඉහත තත්වයෙන් අනතුරුවය.

 1992 මැතිවරණ ප්‍රචාරන ව්‍යාපාරයේදී බිල් ක්ලින්ටන් සැක්සෆෝනය වාදනය  කළ අයුරු

  1992 ඇමෙරිකා මැතිවරණ ව්‍යාපාරය හැඳින්වෙන්නේ  ''Old Media, New Politics '' ලෙසයි. එහිදී රාත්‍රී ගුවන් විදුලි සහ රූපවාහිනී වැඩසටහන්, පුවත් සඟරා, MTV හෙවත් සංගීතය මුල් කරගත් නාලිකා, මුද්‍රිත මාධ්‍ය, රූපවාහිනී ටැබ්ලොයිඩ් වැඩසටහන් ආදිය යොදා ගැණිනි.

1992 වසරේ සිට ඇමෙරිකා මැතිවරණ ප්‍රචාරණ ව්‍යාපාර සඳහා වෙන් කළ මුදල් ප්‍රතිශත ලෙස

  1992 වසරේදී ඇමෙරිකා මැතිවරණයට අන්තර් ජාලයේ කිසිදු දායකත්වයක් නොවීය. එය 1996 වසර වන විට 3%ක් විය. ක්‍රමයෙන් වර්ධනය වූ එය 2007 වසර වන විට 47%ක් දක්වා වර්ධනය වී ඇත. 2008 වසරේ ඇරැඹි ඇමෙරිකා ජනාධිපතිවරණ ව්‍යාපාරය නව මාධ්‍ය වැඩි වශයෙන් යොදා ගත් මැතිවරණයයි. වෙබ් අඩවි, බ්ලොග්, වීඩියෝ වෙබ් අඩවි, වැනි ඒවා මඟින් බොහෝ සමාජ සුභ සාධන ව්‍යාපාර ද දියත් විය. එම මැතිවරණයේදී තොරතුරු හුවමාරු කළ ප්‍රධාන සන්නිවේදන මාධ්‍ය බවට පත් වූයේ නව මාධ්‍යයි. එහිදී සමාජ මාධ්‍යවලට ද ප්‍රධාන ස්ථානයක් හිමි විය. එමෙන්ම දේශපාලනඥයෝද නව මාධ්‍ය කෙරෙහි යොමුවන අයුරු දක්නට ලැබේ. පුවතපත් වැනි සාම්ප්‍රදායික මාධ්‍යවලට වඩා මෙම නව මාධ්‍යවලට තරුණ ප්‍රජාවගේ වැඩි කැමැත්තක් හිමිවීමත්, එය වඩා පහසුදායක වීමත් වැනි හේතු නිසා එම නව මාධ්‍ය සහ සමාජ මාධ්‍ය මැතිවරණ ව්‍යාපාරවලදී වඩාත් ජනප්‍රිය විය. මහජන මතය විමසීම, සමීක්ෂණ ආදියටද නව මාධ්‍ය යොදා ගැනීම ඇරැඹීමත් සමග සාම්ප්‍රදායික මාධ්‍යවලට සාපේක්ෂව ඊට යොමු වන පිරිස වැඩි විය. මෙම නව මාධ්‍ය වැඩසටහන්වලට වඩාත් දායක වූයේ තරුණ ප්‍රජාව සහ බුද්ධිමත් පිරිසය. 

1996 - 2006 කාල පරාසය වන විට වෙබ් අඩවි, ඊමේල් හෙවත් විද්‍යුත් තැපෑල , කතිකාවත්, බ්ලොග් අඩවි ආදී නව මාධ්‍ය අංග ඇමෙරිකාවේ මැතිවරණ ප්‍රචාරණයට එක් විය.


  නව මාධ්‍ය තුළ ( Microblogging) හෙවත් කෙටි පණිවුඩ ක්‍රමවේදය අතිශය ජනප්‍රිය වී ඇත. එය ස්වභාවයෙන්ම කෙටි පණිවිඩයක් වීම නිසා පැහැදිලව ග්‍රහණය කර ගැනීමට හැකි වීම ඊට එක් හේතුවක් විය හැක. ඡායාරූප, වීඩියෝ දර්ශන යනාදිය ද ඇතුලත් කළ හැකි නිසා තේරුම් ගැනීම තවත් පහසු වී ඇත. මෙම ක්‍රමයේ වාසි කිහිපයකි. අවම කාලයක් තුල සන්නිවේදනය සිදු කළ හැකි වීම, ජංගම දුරකථන ඔස්සේද භාවිත කළ හැකි නිසා පහසුදායකය, තොරතුරු ප්‍රචාරය කිරීම ( share ) පහසුය, අනුගාමිකයන් ( Followers) රැසක් සිටින නිසා එක වර විශාල පිරිසකට තොරතුරු සන්නිවේදනය කළ හැක. මහජනතාවගේ අදහස් සෘජුවම ලබා ගැනීමට හැකි වීම නිසා වෙනත් සමීක්ෂණ ආදියට යන පිරිවැය අවම වීම වැනි වාසි මෙම Microblogging තුළ දක්නට ලැබේ. වර්තමානයේ වඩාත් ප්‍රචලිත Microblogging වන්නේ Twitter  හෙවත් ට්විටර් පණිවුඩ ක්‍රමයයි.

  ලොව ප්‍රබලම රාජ්‍ය වන ඇමෙරිකාවේ ජනාධිපතිවරයා පවා සිය මැතිවරණ සමයේදී යොදා ගත් ප්‍රධාන ක්‍රමය වූයේ මෙම ට්විටර් පණිවිඩ ක්‍රමයයි.

ඇමෙරිකා ජනාධිපති ඩොනල්ඩ් ට්‍රම්ප්ගේ ට්විටර් ගිණුම 

ඇමෙරිකාව තුළ යොවුන් ප්‍රජාව දේශපාලනය දෙසට යොමු කිරීමට, ඔවුන්ට ඒ පිළිබඳව උනන්දුවක් ඇති කිරීමට සමාජ මාධ්‍ය ඉවහල් වී ඇත. යොවුන් ප්‍රජාව වෙනුවෙන් ඇප් වර්ග හඳුන්වාදීම ආදිය මඟින් ඔවුන් වෙත දේශපාලන සන්නිවේදන කටයුතු සිදු කළ හැක. ස්මාර්ට් ජංගම දුරකථන, ගූගල්, ට්විටර් වැනි සමාජ මාධ්‍ය ආදිය  ඇමෙරිකාවේ යොවුන් ප්‍රජාව තුළ දේශපාලනය කෙරෙහි සැලකිය යුතු මට්ටමින් උනන්දුවක් ඇති කිරීමට හේතු වී තිබෙන බවට විවිධ සමීක්ෂණ වාර්තා සනාථ කෙරයි. සමීක්ෂණ ආදියටද ( මත විමසීමට ) සමාජ මාධ්‍ය යොදා ගත හැකි නිසා සාම්ප්‍රදායික මත විමසුම් ක්‍රමවලට මැළි කමක් දක්වන යොවුන් ප්‍රජාව ආකර්ෂණය කර ගැනීමට හැකි වී තිබේ.  2011 සිට 2015 වසර දක්වා චිකාගෝ විශ්ව විද්‍යාලයේ සිදු කළ අධ්‍යයනයක් මඟින් යොවුන් සහ තරුණ ප්‍රජාවගේ දේශපාලන අදහස් ලබා ගැනීමේදී වඩාත්ම සාර්ථක මාධ්‍ය සමාජ මාධ්‍ය බවට තහවුරු වී තිබේ.

  ඇමෙරිකා ජනාධිපතිවරණයෙන් අනතුරුව ඉහළම මුදලක් වැය කළ මැතිවරණය ලෙස සැලකෙන්නේ 2014 වසරේදී පැවැති ඉන්දීය මහ මැතිවරණයයි. වත්මන් අග්‍රාමාත්‍ය ''නරේන්ද්‍ර මෝදි'' ඇතුළු භාරතීය ජනතා පක්ෂයේ ජයග්‍රහණය උදෙසා දැවැන්ත ප්‍රචාරණ වැඩසටහනක් ක්‍රියාත්මක විය. එහිදී මෝදි වෙනුවෙන් ඉතා පරීක්ෂාකාරී ලෙස සැලසුම් කළ සම්ප්‍රචාරණ වැඩසටහනක් (      Propaganda ) දියත් විය. ඊට සාම්ප්‍රදායික පුවත්පත්, ගුවන් විදුලි සහ රූපවාහිනී මාධ්‍යවලට අමතරව සමාජ මාධ්‍ය යොදා ගැනීම, අරමුදල් සම්පාදනය, ඩිජිටල් රැලි ආදියද යොදා ගැනුණි. මෙහිදී මහජන සම්බන්ධතාව ඉහළ නැංවීම කෙරෙහි වැඩි අවධානයක් යොමූ වූ අතර බාල, තරුණ, මහලු, ස්ත්‍රී සහ පුරුෂ යනාදී විවිධ පාර්ශව ඉලක්ක කර ගනිමින් පුළුල් ප්‍රචාරණයක් දියත් විය. ඊට සාම්ප්‍රදායික රැස්වීම් ආදිය මෙන්ම සමාජ මාධ්‍යද බහුල ලෙස යොදා ගැනුණි. 

ඉන්දීය අග්‍රාමාත්‍ය නරේන්ද්‍ර මෝදිගේ ට්විටර් ගිණුම

ඉන්දීය අග්‍රාමාත්‍ය නරේන්ද්‍ර මෝදිගේ ට්විටර් ගිණුම

 එහිදී ෆේස්බුක් පමණක් නොව ට්විටර් පණිවිඩ ද බහුල ලෙස යොදා ගන්නා ලදි. ''නරේන්ද්‍ර මෝදි''ගේ මැතිවරණ ව්‍යාපාරයේ වඩාත් වැදගත් අංගයක් ලෙස දැක්වෙන්නේ ඔහු තමන්ට ලැබෙන ට්විටර් පණිවිඩ ආදියට පිළිතුරු සැපයීමයි. ඔහු බොහෝ විට සුප්‍රසිද්ධ නළු නිළියන්, ක්‍රීඩකයින් වැනි ඉන්දීය ජනතාව තුළ ප්‍රසාදයක් දිනූ පුද්ගලයින්ගේ ටුවිටර් පණිවිඩවලට ප්‍රතිචාර දැක්වීම ද දැක ගැනීමට හැකිය. එනම් තමන් ඉන්දීය ජනතාව මෙන්ම ඔවුන් හා සමාන ගති පැවතුම්වලින් පිරි කලාවට, ක්‍රීඩාවට ඇල්මක් දක්වන පුද්ගලයකු බවට මෙහිදී ජනතාව තුළ මතයක් ඇති කරවන ලදී. මෙතුළින්ද ඔහු ජනතාව වෙත ආකර්ෂණය වීමට උත්සාහ කළ බවක් පෙනේ. මෝදිගේ මැතිවරණ ව්‍යාපාරය සඳහා ඇමෙරිකා ඩොලර් මිලියන 700ක මුදලක් වැය වූ බවට එරට මාධ්‍ය වාර්තා පෙන්වා දෙයි.   

  ලොව වැඩිම පිරිසක් අනුගමනය කරන ට්විටර් ගිණුම් අතර 21වැනි ස්ථානය ඉන්දීය අග්‍රාමාත්‍ය නරේන්ද්‍ර මෝදිගේ ගිණුමට හිමිව ඇත. එමෙන්ම ආසියානු කලාපයේ ඉදිරියෙන්ම සිටින ට්විටර් ගිණුම් හිමියා වනනේ ද ඔහුයි. අලෙවිකරණ ක්ෂේත්‍රයේ විශේෂඥයකු වන ''පිලිප් කොට්ලර්'' වරක් ප්‍රකාශ කළේ ''මෝදිගේ'' මැතිවරණ ව්‍යාපාරය තුළ තම අලෙවිකරණ හර සංකල්ප වන 4 P ( Product, Price, Place, Promotion ) මැනැවින් ක්‍රියාවට නංවන අයුරු තමා දුටු බවය. ''කොට්ලර්'' වැඩි දුරටත් සඳහන් කළේ මෝදි යනු ''නිෂ්පාදනයක්'' ( Product) වන බවටය. එම නිෂ්පාදනය නිසි ලෙස ස්ථානගත කිරීමට ඔහුගේ මැතිවරණ ප්‍රචරණ ව්‍යාපාරය සමත් විය. 2014 මැතිවරණ සමය තුළ මෝදි වෙත ට්විටර් පණිවිඩ මිලියන 11කට අධික සංඛ්‍යාවක් ලැබුණු බවට වාර්තා වේ.

  එමෙන්ම ආසියානු කළාපයේ ට්විටර් ගිණුම් හිමි දේශපාලනඥයින් අතර පකිස්ථාන අග්‍රාමාත්‍ය ඉම්රාන් ඛාන් ඉදිරියට පැමිණෙමින් සිටී. ඔහු ද සිය දේශපාලන කටයුතු සඳහා වඩාත් සක්‍රීය ලෙස ට්විටර් ගිණුම යොදා ගනී.

       පකිස්ථාන අග්‍රමාත්‍ය ඉම්රාන් ඛාන්ගේ ට්විටර් ගිණුම

   ඉහත සියලු සාධක සලකා බැලීමේදී ප්‍රත්‍යක්ෂ වන කරුණ වන්නේ, දේශපාලන කටයුතු නිසි ලෙස පවත්වාගෙන යෑමට සන්නිවේදනය අත්‍යාවශ්‍ය වන බවටය. නූතන දේශපාලනය දෙස අවධානය යොමු කිරීමේදී එහි සාර්ථකත්වය සඳහා නවීන තාක්ෂණය සමග හඳුන්වාදුන් සමාජ මාධ්‍ය වැනි නව ක්‍රම වඩාත් සාර්ථක වෙමින් පවතින බවට දක්නට ලැබේ. කාර්යබහුල ජීවන රටාව තුළ වඩාත් සාර්ථක වන්නේ ජංගම දුරකථනය වැනි මාධ්‍ය ඔස්සේ සරලව ක්‍රියාත්මක කළ හැකි සන්නිවේදන ක්‍රියාදාමයන්ය. සමාජ මාධ්‍ය එහිදී අන් සියලුම සාම්ප්‍රදායික මාධ්‍යවලට වඩා ඉදිරියෙන් සිටී. දේශපාලනඥයෙකුට තම පණිවිඩ, මහජනයා වෙත සන්නිවේදනය කළ හැකි ප්‍රධාන මාධ්‍යක් ලෙසට ට්විටර් දැක්විය හැකිය.

Chanika Athauda

:( SC/MAMM/2018/2019/13/ATHAUDA C.M.K )

:Online Media (MMMM 623 MMS 133 )

නව මාධ්‍ය භාවිතයේ අතරමං වූ මානව සම්පත

කාර්මික විප්ලවය සහ බුරුසුවා පනත බිහිවිමත් සමගින් මධ්‍යගත යු‍ගයේ මිනිසා තමන්ගේ තොරතුරු පිපාසාව හෙවත් තොරතුරු උපයෝගිතාවය සංසිදුවා ගනු ලැබුවේ මුද්‍රිත මාධ්‍ය භාවිතයෙන් වේ.  චීන ජාතිකයින් විසින් පුරාතනයේදී සොයාගත් කඩදාසී නිෂ්පාදනය භාවිතයෙන් වඩාත් වර්ධනය වූ මුද්‍රිත කාර්මාන්තය තුලින් පුවත්පත් සහ ග්‍රන්ථ ප්‍රකාශන බිහිවීම සිදුවිය.  වැඩවසම් සමාජයෙන් ඈත්වී මිනිසුන්ට නූතන සමාජය දක්වා පරිවර්ථනය වීමේ ක්‍රියාවලිය සඳහා පිටිවහලක් සැපයීම මුද්‍රිත මාධ්‍යයේ කාර්යභාරය විය.  

එහි ප්‍රථිපලයක් ලෙස සංහතික මාධ්‍යයේ දියුණුව සහ සංහතිකයාගේ සාක්ෂරතා වර්ධනයද ගෙන හැර දැක්විය හැක.

සමාජයක සමාජීය/දේශපාලනික/ආර්ථික සංස්කෘතිමය දියුණුව සඳහා මිනිසාගේ ක්‍රියාකාරකම් හා යහපත් ප්‍රතිඵලයන් ඉවහල් වන අතර අන්නෝන්‍ය වශයෙන් සමාජ ස්ථරයන්ගේ සාමාජිය දේශපාලනික සහ ආර්ථික ප්‍රතිපත්ති සහ අභිලාෂයන් පිළිබඳ දැනුවත් වීමේ දි උක්ත මුද්‍රිත මාධ්‍ය භාවිතයේ පිටිවහල ඍජුවම බලපනා ලදි. කිසියම් සමාජයක නිර්මාණාත්මක ප්‍රවේශයන්ගේ ප්‍රාමාණික බව එම සමාජයේ පැවැත්ම උදෙසා මහඟු මෙහෙවරක් සිදු කරයි.  උදාහරණයක් ලෙස සෘජුවම සමාජගත කල නොහැකි සංසිද්ධීන් පිළිබඳව කලාකරුවා සාහිත්‍යකරුවා ඔහුගේ නිර්මාණකලාව මෙවලමක් ලෙස යොදා ගනිමින් අප‍හාසත්මක හෝ උපහාසත්මක ක්‍රමෝපායන් භාවිතයෙන් සාහිත්‍ය නිර්මාණයේ සමාජගත කරනු ලබයි.

ඒ තුළින් සමාජයේ සියළු අංශ වෙත බලපෑම් කරන අතර,  එම ක්‍රියාවලිය අවසානයේදි සියල්ලටම පොදු ධර්මතාවයන් සංස්කෘතින් උප සංස්කෘතින් නව නීති හා ක්‍රම සම්පාදනයන් මගින් සමාජය නිවරදි මාවතකට යොමු කරය  මේ වු කුලි සාමාජීය අවශ්‍යතාවක් වන අතර, ඒ සඳහා මුද්‍රිත මාධ්‍යයේ වගකීම මෙහෙවර අතිමහත්ය.

උදාහරණයක් ලෙස ගතහොත් මාර්ටින් වික්‍රමසිංහයන්ගේ ගම්පෙරළිය පරිශීලනයේ දී අපගේ සංස්කෘතික ග්‍රාම්‍ය ගුණංග සහ හැසිරිම පිළිබඳ දැනුම සහ අවබෝධය මැනවින් උකහා ගත හැක.

වැනි‍සියේ වෙළෙන්දා මුල් කෘතිය සම්පාදනයෙන් වැනිසියේ තිබු නීතිමය තත්ත්වයන් යථාවත් වී නව නීති ප්‍රසම්පාදනය කිරීමට වැනිසිය කටයුතු කල බව අප හොඳින් දන්නා කරුණකි. 

කෙසේ වුවද මෙම මුද්‍රිත මාධ්‍ය මගින් සංහතිකයා සංවර්ධනය වී ඔපමට්ටම් වුවද සහශ්‍රයේදි සංවර්ධනය වූ සමාජ මාධ්‍ය නිසාවෙන් නැවතත් නුතන සංහතිකයා ආපස්සට ගමන් කිරිම අරඹා ඇත. 

එනම් මේ වන විට පුවත්පත් පොත්පත් ග්‍රන්ථ කෘතින් පරිශිලනය කිරිමෙන් බැහැරව එයද ඉලෙක්ට්‍රොනික උපකරණ මෙවලම් භාවිතයෙන් උකහා ගැනීමට පෙළඹී ඇත. සෞන්දර්යාත්මක කෘතින් නිර්මාණ පතපොත පරිශිලනය කිරිමේ අලස කම වර්තමානයේ කුඩා දරුවාගේ සිට මහල්ලා දක්වා එකසේ මනස්ගත වී ඇත.  මෙය ඉතා අවාසනාවන්ත තත්ත්වයකි.  මෙ ඔස්සේ මිනිසා සීමා සහිත රාමුවකට කොටු වූ බවක් දක්නට ලැබේ.  විශේෂයෙන්ම ළමා මනස සංවර්ධනය කිරීමේ හි ලා  මහත් පිටිවහලක් වූ පත පොත පරිශිලනය වේගයෙන් මියයමින් සිටි.  මේ සඳහා කිසිදු විකල්පයක් ලබාදීමට නොහැකි වී ඇති අතර, සිදුව ඇත්තේ වැළකීම නොව වැනසීම අවම කර ගැනීම වේ.

සාමාජීය මනු ධර්ම අන්නෝන්‍ය අවබෝධය සංවේදි බව හා මානව හිතවාදි දෘෂ්ඨිවාදි පැතිකඩ සම්පූර්ණයෙන්ම වැළලී ගොස් ඇති අතර, ඉලෙක්ට්‍රොනික් මෙවලමකට යටපත් වී තම දෛනික දිවිපෙවෙත ගත කිරිම මුළු මහත් සමාජයේම පුරුද්දක් ‍බවට පත් වී ඇත

කොතරම් විද්‍යාත්මක අවදානමක සේයා මතුවුවද ඉලෙක්ට්‍රොනික ලෝකයෙන් මිදීමට ගෝලීයකරණය වූ සංහතික සමාජය දැන්  ප්‍රමාද වැඩි බව හැ‍‍ගේ

සියදිවි නාසාගැනීම්/අනාථ නිවාස/ගබ්සාව ආදි සාමාජීය අවපතයන් මිනිස් සිරුර තුල නිදන් ගතවී ඇත්තේ ඔවුන්ගේ මනස තුල සෞන්දර්ත්මක පදනමක් නොපවතින නිසාවෙනි.  ඔවුන් මෙම තත්ත්වයට ගොදුරු වුයේ  මුද්‍රිත මාධ්‍යයේ පිරිශිලනය පසෙකලා ඉලෙක්ට්‍රොනික ලෝකයට පය තැබු දා සිටය.

මහා දාර්ශනික මනෝවිද්‍යාඥ සිග්මන් ප්‍රොයිඩ් ගේ මතවාදය අනුව මිනිසාගේ සිත තුළ පවතින තෙවැදෑරුම් සිතුවිලි ත්‍රිත්වය එනම් ID/EGO/SUPER EGO යන තත්ත්වයන් හි ඇතිකරගත යුතු ස්වයං විනිශ්චයන් හා පාලනයන් ප්‍රගුණ කිරීම සඳහා අවශ්‍ය ප්‍රතිරෝධාත්මක බලවේග මනස තුළ ගොඩනැගිය යුතු ය. ඒ සඳහා මිනිස් සිත තුළ ජනිත කළ යුතු සෞන්දර්යාත්මක ප්‍රඥාව ප්‍රවර්ධන කිරීමෙ හි ලා පතපොත පරිශීලනය හෙවත් මුද්‍රිත බස පරිහරණය කිරීමට මහඟු ක්‍රමවේදයකි.

එහෙත් එයින් මිදී සීඝ්‍රයෙන් සහ සංස්කරණ වූ අසම්පූර්ණ විද්‍යුත් කියවීම් ඒ සඳහා ප්‍රමාණවත් දායකත්වයක් නොසපයයි.  දීර්ඝ කාලීනය මෙම තත්ත්වය වර්ධනය වී හෝමෝ ඉක්ටේකස් හෝමෝ සයිපියන් ආදී මානව සමාජයෙන් වර්තමාන සංවර්ධිත මිනිසා දක්වා පැමිණි වර්තමාන ගමන් ගම නැවතත් ආපහු හැරි පුරාතන හොමෝ සයිපියන් දක්වා ගමන් කිරීමට කා හට වලකාලිට හැකි වේද?

අනාගතයේදී නවතක් හෝ වෝ සමාජියත් මුණගැසි තමන්ගේ විද්‍යුත් මෙවලම ඔහුට භාරදි එතැන් සිට ජීවිතය ඇරඹිමට අපේක්ෂා කරමු.

SC/PG/MM/2014/2015/18

ඩී.පී.මහේෂ් නිශ්ශංක 

මාධ්‍ය ඒකාධිකාරය හා සමාජ මාධ්‍ය භාවිතය

මාධ්‍ය ඒකාධිකාරය හා සමාජ මාධ්‍ය භාවිතය

මිනිසාගේ ආරම්භයත් සමඟ පැවත එන සන්නිවේදන අවශ්‍යතාවය මානවයාගේ පරිණාමය සමග ම යාවත්කාලීන වී පරිණත දියුණු විද්‍යාත්මක පසුබිමක් සහිත මොහොතින් මොහොත වෙනස් වීමට භාජනය වන විෂය පථයක් බවට පත් වී ඇත.  එය කොතෙක් දුරට සංවර්ධනය වී ඇත් ද යත් මේ වන විට සන්නිවේදන ක්‍රියාවලි ජ්‍යාත්‍යන්තර වශයෙන් පිළිගත් විෂය ධාරාවක් බවට ද පත් වී ඇත.

මේ තත්ත්වයක දී මූලික වශයෙන් සම්ප්‍රදානුකූල සන්නිවේදන ක්‍රියාවලියේ විද්‍යුත් ප්‍රවිශ්ඨයන් වූ ගුවන් විදුලිය හා රූපවාහිනිය ප්‍රවර්තකයන් ලෙස කටයුතු කළ ද සහශ්‍රයේ දී සංවර්ධන වූ සමාජ මාධ්‍ය අද මේ වන වට සමාජයීය / දේශපාලනික / ආර්ථික  සංස්කෘතික වශයෙන් පෙරළිකාර මාධ්‍ය විධික්‍රමයක් ලෙස ස්ථාපනය වී ඇත.

කුඩා විද්‍යුත් ඉලෙක්ට්‍රොනික උපකරණයක් භාවිතයෙන් ලොවක් ආමන්ත්‍රණය කීරීමේ විශ්වීය ගුණාංගය හේතුවෙන් මේ තත්ත්වය සීඝ්‍රයෙන් ප්‍රචලිත හා ජනප්‍රිය වී ඇත.

ගෝලීයකරණයට ලක්වූ සමාජ වපසරියක මූලාරම්භය සඳහා සමාජ්‍ය මාධ්‍යයේ දායකත්වය සුළුපටු නොවේ. 

කිසියම් රාජ්‍යයක දේශපාලනික හා ආර්ථික ප්‍රතිපත්තීන් හි සමාජ පැතිකඩ විවරණය කිරීමේ හා විවේචනය කිරීමේ හැකියාව මත රජ්‍යයන් හි දේශපාලනික ගතිකයන්ට මඟ පාදන ඉලෙක්ට්‍රොනික සාධක අතර, වඩාත් සාධණීය කාරණාවක් බවට මෙම සමාජ මාධ්‍ය පත්වී තිබේ.

අවමයෙන් ද්විපාර්ශ්වික හෝ ඊට වඩා පාර්ශ්වීය දායකත්වයක් සහිත බැවින් මේ සදහා පවතින ඉල්ලුම ඉතා ඉහළ මට්ටමක පවතී.  ග්‍රාහකයාගේ විචාරශීලී නිගමනයන් සඳහා ඇති ඉඩකඩ නිසාවෙන් මෙම තත්ත්වය සමාජ ස්ථරයේ සරළ සාමාන්‍ය භාවිතයක් බවට පත් වී ඇත.

අධිතාක්ෂණික මෙවලම් භාවිතයෙන් ක්‍රියාත්මක වීම මත ග්‍රාහකයාගේ තොරතුරු උපයෝගීතාවය වඩාත් වේගයෙන් හා ඔහුගේ අවශ්‍යතාවයට අනුකූල ලෙස සැපයීමේ විශේෂ හැකියාවක් මත මෙම සමාජ මාධ්‍ය වාඩා ඉදිරියෙන් පවතින අතර, ඒ හේතුවෙන් සාම්ප්‍රදායික ඒක පාර්ශ්වීය මාධ්‍ය රටාව ක්‍රමයෙන් ග්‍රාහක සමාජය බැහැර කිරීමට ලක් වී ඇත.

කාලය හා අවකාශය මත සියල්ල තීරණය වන අධි තාක්ෂණික යුගයක මෙම තත්ත්වය බහුල වශයෙන් ව්‍යාප්ත වුව ද මෙම හේතුවෙන් සමාජයේ අචාර ධර්ම සහ පෞද්ගලික නිදහස සංස්කෘතීමය රාමුව බිඳවැටී ඇති අතර, මෙම සමාජ මාධ්‍ය වනාහි සහශ්‍රයේ මිනිසාගේ හිස පැළදි කටු ඔටුන්නක් මෙන් ම දැලි පිහියෙන් කිරි කෑමේ ක්‍රියාව මෙන් අවදානම් සහිත බව ද අමතක නොකළ යුතුව ඇත.    

SC/PG/MM/2014/2015 /18

ඩී.පි. මහේෂ් නිශ්ශංක